وباموت معاهُمْ كُلْ يومْ
في غزه
وفلسـطين السَليبَه .. كُلَّها ..
مافيش أمان
" مِنْ يوم ما باعها وَعْدْ بلفور الخسيس "
" وليوم ما باعها الأمريكان "

مِنْ يوم ما باعها وَعْدْ بلفور الخسيس
اللي لا يملك مِنْها شئ
باع أرضها
باع أهلها ، ومَصير حَياتها كُلَّها
لِحْفان يَهود
لِحْفان صَهايْنه .. زي دود ..
والدود بيُنْخُرْ عَضمَها
ويْبيد قُرَى كامْلَه بكامِلْ أهلها ..
شجَرْ الزتون والبُرتقان يجتثُّه دود مِنْ مَأْمَنُه
ومنين يجيب شجر الأمان
وازاي يعيش إنسان في بيتُه في أمان
ومجاورُه دود !
دود مِنْ صهاينه مَلْعونين
بيخلخِلوا في كُل شئ
حَتى الأدان في الأقصَى
في القُدْس الشريفه
يحتالوا حتى يمنعوه !
والمَسْجد الأقصَى الشريف مِنْ حَفر دود ؛ بيخلخِلوه ..
مِنْ يوم دخولهُم في المَكان
إتخلْخِلِت جُدران شريفه وانمَحَت بُلْدان
وصاح الناس : يا ناس .. مافيش أمان ..
بَسْ الجيران مِنْ غير وِدان !
والدود ؛ يَهود م الصَهيونِيَّه .. مُجْرِمين ..
إجرام مِحَدِّدْ خطتُه
م النيل وحَتى نهر دِجْلَه والفرات ..
الدود ساعات يِتْمَد في سينا وغزه والجولان
وان يِلْتِقي إنسان يِواجهُه ؛ راح يموت
أو يختِفي .. فالدود جَبان ..
بَسْ المُصيبَه إن بَعض الناس بيِبْقَى جُبْنها أَقوَى
فتِتْصالِحْ مع الدود اليَهودْ الصَهيونِيَّه المَلعونين ..
مِشْ مِن يَهود موسَى .. ولا يِقْدَرْ نبي يِحْمِلْ جرايِمْهُمْ
ويْواجِه الرَب الرَحيم ..
ويْقول : " دَه شَعْبي المُجرِمين " ! ..
مِشْ من يَهود موسَى الأمين ..
لكِن يَهود بالإدِّعاء
ماحيين من الدنيا الصفاء بالإجتراء على كُل دين ..
والناس في كُل الكون تشاهِدْ بَغيُهُمْ
تُصْرُخ : يا دود .. الأبرياء إيه ذنبُهُم ؟!
إيه ذنب أطفال مَوْلودين ؟
..
الدود أَكَلْ كُل الشجر ..
شجر الزتون والبُرتقان .. والناس ... إبادِةْ مُجرِمين ..
والمَسْجِد الأقصَى الشَريف
وما فيش مُبيدْ حَشَري ف مُقاوْمَه مُنَظَّمَه
يِقْدَرْ يِبيد الدود ..
ويِهِدْ بَغي السَفَّاحين ..
ويْعود أمان في قلب طفل بيتولد في أرض حُرَّه طَيِّبَه
كان إسمها قبل استلاب الدود لها : فلسـطين ..
والدود إذا اتوَحِّشْ وجار .. وان ساعْدُه حَد من الكُبارْ ..
راح يسْتمِرْ إسمُه دود ..
وان يِدِّعي دين اليَهود ..
والدين بَرئ م السَفَّاحين
والأرض يُصْرُخ نبضها بين العِباد .. كارْهَه استلاب الدود لها ..
مِتْوَجَّعَه .. وان نِسْتمع .. نبْض الأنين بيقول : أنا فلسطين
ومَهما يموت ف قلبي كُل يوم مليون شهيد
راح يِخْلَق الرب الرحيم ناس مِنْ جديد
ح يعيدوا أشجار الزتون والبُرتقان
ويْعود أمان المَسْجد الأقصَى الجريح
ويْقولوا بالقول الصَريحْ : دول مش يَهود ..
حاشا لِموسَى ينتِسِبْ لُه سَفاحين
وان يِدِّعوا .. أو يبدِعوا في الإحتيال
المَسألَه / الأَقوَى مين ؟ .. الدود وإجرامُه المُبين ..
وَلاّ الضمير في قلوب بَشَر مُتفرِجين ع المَذبَحَه ..
وان يُسكُتوا ؛ ح يصيروا حَتماً آثِمين .. شُرَكا ف جَريمِةْ سفاحين ..
والمَسأَلَه لا تحتمِلْ شِعْر وكلام
لَكِنُّه نوع م التذكِرَه
والذِكْرَى تحيي المؤمنين ...